《mag爲食紀》抵食、味道OK--喜記蟹將軍：雙蟹宴

話說，同事見到免費報紙有蟹將軍雙蟹宴的廣告，$988/4-6位用，仲有$50 coupon，那平均一位就大約百幾蚊，有蟹有蝦有蜆，梗係即刻BOOK啦。

 

蟹將軍尖沙嘴分店位於Isquare，我地呢日book得早（平日6點多），居然裏面都有不少顧客。

除了雙蟹宴，因爲我地有7個人，我地另外加多一客金菊豆花湯（$55)，而每位計的火焰富貴蝦我地就無多點。

 

 

室内環境舒服

 

朋友不是個個都會吃很多海鮮，所以我地都另外叫了幾樣$66的特價小菜。

 

餐牌

 

雙蟹宴Details：

可供4-6位用
需另收加一與茶介（$10/位）

 

 

火焰富貴蝦

上枱時有點被嚇倒，因爲完全聯想唔到這個啫喱杯。
說好的火焰呢？侍應說之前已用火焰揮發菜式的酒精（?)
幾時？將道菜冷藏前的事？那火焰好像不太關事

這道菜其實有點似啫喱水晶餚肉個層啫喱加上瀨尿蝦肉。
瀨尿蝦肉本身無問題，但sorry我不太會欣賞個層不知道怎麽形容的味道（海鮮高湯？）的啫喱，所以只刮了下面的瀨尿蝦吃。

花甲汁火焰蜆

 

 

呢道菜的包裝都幾特別，是將蜆包在錫紙袋裏面，再在上桌後點火煮熟。
但一打開，有陣超怪的香味，好似女人香水般的人工香味。
雖然食落的味道唔覺得奇怪，但放入口個刹那聞到個香水味真係唔開胃
最後忍唔住同經理講，幫我地換過碟。
據稱係之前個碟的花甲汁落多左。哦哦哦，原來花甲汁=香水味，真係長知識。
換過之後個碟味道同香味即刻正常返，係類似清酒煮蜆。

金菊豆花湯

賣相係好靚（個豆腐半切絲好似菊花般），但味道非常一般

 

濃香啤酒蟹或娘惹咖喱蟹

我們選了濃香啤酒蟹。
有輕微的啤酒味，比較似cream sauce。
無算濃味，清清地，可以提升到蟹肉的鮮味。

 

喜記正宗炒辣蟹

超級好味！！！！！
個炸蒜蓉超級好味，完全可以拿來配飯。
同啤酒蟹一樣，其實個蟹都OK大隻（中size），都算多肉

古法豉油雞煲

意外的好味道。
雞肉肉質很嫩，

濃湯雲耳鮮茄浸時菜

幾好食，但菜略嫌少了點（比較多雲耳鮮茄菇類）

鮮蟹肉蠔仔泡飯

 好味！蠔仔都算OK大隻而且係鮮蠔仔
都有不少蟹肉，good

 

附送的番薯糖水

 

 

以上就係蟹將軍雙蟹宴的菜式，我地另外點的$66特價小菜有呢d

蟹油蒜香骨

（唔記得影）
OK啦，不太感覺到咩蟹油（=食到蟹味？無咯）
我覺得有點炸過龍，所以有點乾硬

海味雜菜煲

不錯！！

沙爹粉絲牛肉煲

粉絲有點太淋，味道不錯

 

黑松露蝦球四季豆

幾好，好多蝦球
朋友話都有輕微黑松露味

總結，每位$220（如果單叫個餐6位每人約$180），又有蟹又有蜆又有雞，我覺得很抵，當然不是所有菜式的味道都極好，但平均算不錯。一班人食飯想平平d食海鮮，蟹將軍的特價餐係不錯的選擇。